Ok

En poursuivant votre navigation sur ce site, vous acceptez l'utilisation de cookies. Ces derniers assurent le bon fonctionnement de nos services. En savoir plus.

Racontaches in picard par Gérard Platevoet et Alexandra Biebuyck : "Ein sourire" par Alexandra

En ce jour de fête des grands-mères Alexandra nous offre un teste de circonstance 

lady-2811666_1920 (1).jpg

"Ein sourire"

 

J’ badoul’ souvint dins m’ ville et ses bieaux alintours.

Ch’est ainsin que j’ démuche alfeos d’ curieuss’s affaires.

J’orcomminch’ chaqu’ matin par ein nouvieau parcours.

Je m'sins tout ébeubi' de ç’ que l’ natur’ m’offère.

 

Ein jour, j’ai arrivé pa d’vant el Reposoir.

Ch’est ein’ maseon d’orpeos dusqu’i-a surtout des vielles.

Et i-in aveot là ein’ d’ l'eaut’ côté du trottoir,

Immobile, acor belle, assis’ su ein’ bancelle.

 

Je n’ l’aveos jamais vu’, mais s’ visach’ m’attireot.                        

À m’mot’ que l’ vint du Nord tcherqueot ses raminvrances.

Ch’est comm’ si ell’ perdreot dins ses mains ein mireo.

Ell’ pormèn’ dins s’ passé, ein meonte d’insouciance.

 

À quoi ç’ qu’ell’ busi’ bin ? Pétête à ces brav’s gins

Qui-éteottent ses parints. I z’eont connu la guerre.

I z’eont bramint souffère, i gagneott’nt peo d’argint.

Rien qu'à s'in raminvrer, v'là qu'ell' se met à braire.

 

Tout duch’mint ein ciel bleu prind l’ plach’ des neuach’s noirs.

Fini de s’ carmousser, s' visache i s’illumine

Comm’ pa d’vant l’ Vierch’ d’Allain quand on orprind espoir.

Elle orpleonqu’ dins s’ jeonesse et cha li r’deonn’ beonn’ mine.

 

Ell’ jeueot à l' guilette avé s’n amiss’ René,

In muchott’ de s’ mopère et du garte-champête.

Ch’éteot ein vieux graignard qu’ell’ faiseot mareonner.

Queull’ vie d’ bénaiss’té  tous ces plaisis d’ fillette.

 

L’ temps i-avale l’s ainné’s et rétreint les passieons.

Ein p’tit queop comm’ tertous, elle a eu des misères,

Mais pou passer toutoute, elle treuveot l’ solutieon.

J’ pins’ mêm’ qu’elle in sourit asteur qu’elle est mémère.

 

Berché’ dins l’ temps passé, tout d’eine s’n attintieon

L’ fait orvénir su tierre. Elle advein’ cris et rires.

Ell’ creot intint’ « Mémèr’ », n’ veot pos d’agitatieon.

Elle, ell’ n’attind perseonn’. Soumaquant, ell’ soupire.

 

In vrai ceull’ belle imache, ej' vas lommint l’ warder :

Ein p’tit garcheon i-aqueurt, el sourir’ grand ouvère.

Ell' le prind su s’n écour. « Ch’est ti, m’ pétit bradé ?!»

J’in sus toute ormuée, hureuss’ pou ceull’ gramère.

 

lexique

- badouler : se promener

- démucher : trouver

- ébeubi : admiratif, stupéfait

- tcherquer : charger

- raminvrance : souvenir

- se carmousser : se tracasser

- guilette : jeu local tournaisien

- rétreinte : diminuer

 - soumaquer : sangloter bruyamment avec difficulté de reprendre son haleine

 

Alexandra BIEBUYCK

Lien permanent 0 commentaire Imprimer

Les commentaires sont fermés.