Racontaches in picard par Gérard Platevoet et Alexandra Biebuyck "El docteur P." de Pierre Noël texte + vidéo (12/09/2021)

docteur.JPG

Docteur P.

 

In est in juin soixante-chinq, vers neuf heures du soir. El docteur P. i-èrmonte l'rue du Couët, avec sin pal'tôt et sin vieux capeau. Tertous i comprindra qu'je n'peux nin dire sin vrai nom à c't'homme. Si qu'i-est à pids, ch'est que s'carrette, ène vièle Dauphine, elle a tché in raque. Adon, i finit s'journée, et i rinte à s'majon. I porte à s'main s'pétite valise de docteur, et i-est mate.

Ch'est l'début d'l'été, et i fait acore clair. I-a fait bin caud aujourd'hu, et les gins is prèntent el fraiche, assis sus les seuls des portes. Is babèltent avec leus vigins. Par les portes ouvertes, in sint les odeurs de cuisine, l'oignon, l'rata. Dins cès m'tités majons, Gaston P. I connot bétôt tertous, des fileurs, des tiss'rands, des bâcleus, tous des ouvris d'fabrique. Oh,... i n'a nin d'rupins par ichi, sais-te ! Tchand qu'i passe, les gins is arrêtent leu babillache pou dire, à chaque fos : « Bonsoir Monsi l'docteur… Bonsoir Gaston,... ». Les hommes is saqutent leus castchettes, et les finmes is ressutent leus mains à leus écourcheus.

In véyant l'vieux Zidore, qui feume s'peupe à l'porte, Gaston P. i li d'mande : « Alors Zidore, comment va ta femme ? Toujours pas décidé à la mettre à l'asile ? ». V'là deux ans achteure qu'Fine elle n'a pus s'tête. S'n'homme i-est obligé de l'loyi dins sin lit, tell'mint qu'elle a v'nu mauvaise ! Ch'est même li qui dot li donner à minger à l'tchulire, comme à in m'tit afant. « Oh non, Monsi l'docteur ! J'sus seûr qu'alfos, elle m'èrconnot acore. Si qu'elle partot pou l'asile, j'pinse qu'elle f'rot ses tros tours d'chagrin... et mi avec ! ». Pou l'quart d'heure, Fine elle dort, et Zidore i s'erpose in bètche in feumant du gris.

In m'tit peu pus long, ch'est l'majon Marcel et Zoë. Acore deux qui n'ont nin eu d'chance. Is n'avotent foque qu'ène file : Rosette. Elle est morte, l'mos passé, à tchinze ans, d'in ma d’pomon qui n'a pôs été sogni timpe assez. Après que l'tchuré i-étot passé, Gaston P. i-avot resté avec elle, jusqu'au derni momint, in t'nant s'mongn. Bin seûr, i savot qu'cha n'servot pus à rin, qu'i n'avot pus rin à faire,... mais l'pétite elle avot tell'mint confiance à « Monsi l'docteur ». Ch'est li qui li a serré ses zis. I-est bétot de l'famile.

I-arrife in face d'amon Vandamme, in ménache d'flaminds v'nu ouvrer dins les filatures d'par ichi. Is n'savotent nin avoir d'afants, mais Gaston P. i-a sôgni l'finme pou cha. Achteure, i-a in m'tit garchon qui tcheurt dins ses djambes. Ç'pétit Hinri, i l'a mis au monde i-a tros ans. Ch'est v'nu in beau m'tit perlou qui n'demande qu'à tcheurir. S'mère, l'grande Léona, elle in profite pou d'minder au docteur des consèles pou nourrir sin tcho.

Tchand qu'i-arrife ène séchu, et qu'i-ouvère s'valise, i-a toudis in sintimint d'éther. I-a là-d'dins in fourbi incroyable. Faut l'vir touiller pou li treuver sin stéthoscope qui tché in piches ou bin s'boîte in fer édoù qu'i met s'seringue à boulir ! Ch'est là aussi qui muche les échantillons d'médicamints qu'i donne à les ceux qui n'savtent nin n'd'acater. Les gins, is l'savtent bin : i n'd'a nin deux comme li pou treuver tout d'sute cheu qui n'va nin amon ène séchi. Même que les docteurs de l'ville is vèntent alfos li d'mander consèle pou des cas délicats.

Gaston P. i-est ichi comme à s'majon, dins cheul'triste rue, avec els ouvris. Ch'est qu'i n'd'a sogni des gins dins ç’ruache. Bin seûr, i n'a nin toudis été payi pou ses consultations. A l'plache, tchand qu'tout i-allot bin, i-èrchevot ène paire d'penn'terres du gardin, ou bin même, in lapin qu'in satchot déyors de s'camuche, pou li donner. Cha fait  qu'i n'est jomais v'nu riche, Gaston P.... Mais cha, i l'savot bin in comminchant : ch'n'est nin in soignant les malheureux qu'in fait fortune ! Li, ch'est tout bell'mint in « médecin d'famile », et ch'est cha s'noblesse. I buzie alfos qu'si li i-avot eu l'chance d’faire d’s études, ch'étot foque normal de soulager les ceux qui s'crèvtent à l'ouvrache. Tchand qu'i vint dins ène majon, s'visite finie, i prind l'temps d's'assire pou boire ène jatte d'fraîche café du marabot... i prind l'temps d'écouter les misères d'ses patients.

Achteure, cha fait bin quarante ans qu'i-a èrtourné s'brouette, Gaston P. A l'inter'mint, je m'souvins qu'l'égliche elle étot trop m'tite et tout pleine. I-avot autant d'gins déyors qu'in n’dins, et i n'd'avot grammint qui brayotent. Ch'étot foque in médecin d'famile, comme i n'd'a pus achteure. Si qu'j'in parle aujourd'hu, ch'est qu'in soir d'hiver, i-a fort lonmint, ch'est li qui m'a mis au monde, et cha... je n'saros nin l'oublier !

Pierre NOEL.


banniere parlache.jpg

04:45 | Lien permanent | Commentaires (0)